Advertisements

Hausa

TAKARDAR SANARWAR MANEMA LABARAI:

MARTANI: A BAR KOTU TA BAYYANA MAKOMAR SHAIKH ZAKZAKY

Biyo bayan Takardar Sanarwar Manema Labarai wadda Matamaki na musamman ga Shugaban Kasa ta fuskacin yada labarai da kuma hulda da kafafen sadarwa ya fitar a ‘yan kwanakin nan, Garba Shehu ya kare gwamnatin tarayyar Nijeriya dangane da ci gaba da yin haramtacciyar tsarewa ba bisa ka’ida ba ga Jagoran Harkar Musulunci a Nijeriya, Shaikh Ibraheem Zakzaky {H}, a inda babu kunya babu tsoran Allah ya shimfida karya da kazafin cewa ‘Yan uwa Musulmi na Harkar Musulunci a Nijeriya ‘yan tashin hankali ne wadanda ba su cancanci samun sassautawa ko tausayawa ba daga bangaren gwamnati, don haka za mu so mu yi bayani kamar haka:

Muzaharorin da muke gudanarwa a kan titunan babban birnin tarayya, Abuja, muna yin su ne saboda nuna rashin yardarmu da kuma amincewarmu dangane da matakin da gwamnatin Nijeriya ta dauka na kin zartar da umarnin da babbar Kotu da ke Abuja ta bayar na a Saki Jagoran Harkar Musulunci a Nijeriya daga haramtacciyar tsarewa ta zalunci da gwamnatin Nijeriya take yi masa wai da sunan “Tsarewa ta bayar da kariya”. Akalla kafin aiwatar da kisan kiyashin Zariya wanda aka kaddamar a cikin Watan Disambar 2015, titunan cikin garin Abuja wadanda suka fi daraja da kima a idon gwamnati fiye da rayukan ‘yan kasa ba su fuskanci ‘mamayar’ ‘yan’ uwa musulmi na Harkar Musulunci a Nijeriya ba.

Babu yadda za a yi a iya tsame hannun Shugaban Kasa Muhammadu Buhari dangane da kisan kiyashin da Sojojin Nijeriya suka kaddamar kasancewarsa Kwamandan Askarawan Tarayyar Nijeriya, lamarin da ya sabbaba kisan ‘yan uwa Musulmi na Harkar Musulunci a Nijeriya, ‘yan kasa fararen hula wadanda ba su dauke da makami sama da dubu daya, wadanda suka hada da Maza, Mata da kuma kananan yara a tsakanin ranekun 12-14 ga watan Disambar Shekarar 2015. Gwamnati ta shelanta cewa ta aikata haramtaccen aiki na rufe gawawwakin ‘yan uwa Musulmi na Harakar Musulunci a Nijeriya guda 347 a cikin kabari na bai – daya a Makabartar da ke kauyen Mando a cikin garin Kaduna bayan kaddamar da wannan mummunan kisan dimbin jama’a, lamarin da ya saba wa kudurin yarjejeniyar Geneva, da ma sauran dukkanin dokokin kasa.

Kuma gwamnatin Tarayyar Nijeriyar ta ki yin aiki da umarnin da Hukumar Bincike ta bayar na kamawa tare da hukunta Sojojin da suka kashe mutane masu son zaman lafiya ‘yan uwa Musulmi na Harkar Musulunci a garin Zariya.

A cikin watan Disambar 2016 babbar kotu da ke Abuja ta yanke hukuncin a saki Shaikh Zakaky da mai dakinsa, Malama Zeenah daga haramtacciyar tsarewa ba bisa ka’ida ba da ake yi masu, a biya su diyya ta Naira Miliyan 50, a kuma gina masa gida a duk inda yake so a fadin Arewacin tarayyar Nijeriya tare kuma da samar masa da kariya ta jami’an tsaro. Gwamnatin Shugaban Kasa Buhari ta yi fatali da wannan umarni na Kotu, ta kuma ki mutunta alfarmar Kotu da kuma Alkalai. To don haka wace kotu ce kuma Shugaban Kasa yake maganar a bari ta bayyana matsayin Jagoranmu?

Saboda iya makirci, sai ga shi gwamnati ta shigar da wata sabuwar kara a gaban wata kotu a garin Kaduna, shekaru uku bayan kisan kiyashin Zariya, wai ana zargin Jagoran Harkar Musulunci a Nijeriya wanda aka harbi mai dakinsa, aka kashe masa ‘ya’ya uku, aka kona Yayarsa da dan Wansa da wuta da ransu, bayan shi kuma an harbe shi a wurare da dama a jikinsa, wai ana tuhumarsa da laifin kisan kai. Wannan ya biyo bayan hukuncin da da babbar Kotun Jihar ta Kaduna ta yanke na sakin ‘yan’uwa Musulmi na Harkar Musulunci a Nijeriya sama da dari daya, lamarin da ke tabbatar da cewa, kawai ana so ne a ci gaba da barin Jagoranmu cikin yanayi na Haramtacciyar tsarewa ba bisa ka’ida ba.

Gwamnatin Nijeriya karkashin Shugabancin Buhari tana so ne da gangan ta mayar da lamarin Harkar Musulunci a Nijeriya lamari na tashin hankali a cikin dukkanin take-takenta wanda ya hada da sha’anin kisan
kiyashin Zariya, da kuma kashe masu gudanar da Muzaharori na lumana a titunan garin Abuja wanda jami’an tsaron gwamnati, wadanda aka samar domin kare fadar Shugaban kasa suka aiwatar, amma dai duk da hakan ‘yan uwa Musulmi na Harkar Musulunci a Nijeriya sun ci gaba da neman ganin an yi adalci ta hanyoyin da suka dace, hanyoyi na hankali da kuma shari’a.

Harkar Musulunci a Nijeriya ba ta taba aiwatar da wani sha’ani na tashin hankali ba ko kuma mamaye tituna kamar yadda fadar Shugaban kasa ta yi zargi na sharri. Harkar Musulunci a Nijeriya ta wanzu ne tun kimanin shekaru Arba’in da suka gabata, kuma a rubuce yake a kundin tarihi cewa Harkar Musulunci a Nijeriya tana aiwatar da harkokinta ne cikin lumana ba tashin hankali ba. In an ji wani abu na tashin hankali ya auku yayin gudanar da harkokinmu, to gwamnati ta turo jami’an tsaronta ‘yan Sanda ko Sojoji domin su aukawa masu Muzahara ta lumana ne da kuma amfani da jami’an tsaro da ta dasa su a cikin mu. Don haka muna kara jaddada nisanta kanmu da aikata duk wani aiki na tashin hankali a yayin Muzaharorinmu na lumana da ke gudana a bisa tituna.

Wannan mummunan hali na rashin dacewa wanda gwamnati ta ke aikatawa dangane da Jagoran Harkar Musulunci a Nijeriya yana nuna aniyarta ne na kara azabtarwa da kuma tunzura wadanda ta zalunta wadanda suka rasa iyayensu, matansu da kuma ‘yan uwansu a harin ta’addanci na kisan kiyashi wanda gwamnatin Buhari ta kaddamar. Sai dai duk hakan, tabbas sun tsaya kyam wajen bin matakai na hankali da kuma shari’a a fagen neman ganin an yi adalci.

Dukkanin wannan lamari yana faruwa ne a sakamakon rashin hangen nesa, rashin sahihiyar makamar siyasa da kuma rashin son adalci na gwamnatin da Shugaban Kasa Buhari yake Shugabanta, wadda ta hada hannu da mahukuntan Kasar Saudiyya domin ta kashe ‘yan Nijeriya kawai saboda suna da sabanin fahimtar addini da su domin kawai ta burge su.

Don haka muna kira ga Gwamnatin Tarayyar Nijeriya da ta daina yaudarar al’umma wajen nuna cewa ita tsarkakakkiya ce a wannan sha’ani da take aikatawa wanda ya zarce na Shaidan. Gwamnati kawai ta bi umarnin da Kotu ta yanke, ta saki Shaikh Zakzaky ta kuma janye kararrakin bogi da ta shigar a gaban kotu da nufin samun damar ci gaba da tsare su.

Ci gaba da tsare Shaikh Zakzaky duk kuwa da ci gaba da tabarbarewa da halin lafiyarsa ke yi aiki ne na azabtarwa tare kuma da jiranya rasa ransa, da nufin haifar da barkewar mummunan tashin hankali a kasa da sunan Harkar Musulunci a Nijeriya. Don haka idan ana so a karyata wannan batu, to gwamnati ta saki Shaikh Zakzaky.

SA HANNU:
IBRAHIM MUSA
SHUGABAN DANDALIN YADA LABARAI NA HARKAR MUSULUNCI A NIJERIYA
Skype:Ibrahim.musa42
21/07/2019
Fassarar Zaharaddeen Sani Malumfashi.

TAKARDAR MANEMA LABARAI WADDA SHUGABAN KWAMITIN FAFUTUKAR GANIN AN SAKI SHAIKH ZAKZAKY YA FITAR KAN HUKUNCIN DA BABBAR KOTUN JIHAR KADUNA TA YI GAME DA BUKATAR BELI SABODA DALILAI NA RASHIN LAFIYA WADDA LAUYOYIN SHAIKH ZAKZAKY DA MAI DAKINSA, MALAMA ZEENAH SUKA NEMA

Manema Labarai, Maza da Mata,

Barkan ku dai.

A jiya Alhamis 18 ga watan Yuli, 2019 ne babbar Kotun Jihar Kaduna ta zauna domin sauraron bayanin takardar neman beli kan dalilai na rashin lafiya, wadda tawagar Lauyoyin da ke tsaya wa Jagoranmu, Shaikh Ibraheem Zakzaky da mai dakinsa suka gabatarwa da Kotun.

Abin takaici, kotun ta kara juya baya ga wanda yake fuskantar tsananin yanayi na zalunci daga gwamnatin Tarayyar Nijeriya. A lokacin da ya fi dacewa, sai ga kotun ta kauce kuma ta tsaya wa gaskiya da adalci don fuskantar bakin zalunci da danniya.

Idan za a iya tunawa dai wadanda ake neman belin nasu suna fama ne da matsananciyar rashin lafiya a inda ake tsare da su, a sakamakon munanan raunuka da suka tsira da su a harin ta’addanci wanda mahukuntan Nijeriya suka kaddamar a kan su ta hannun Jami’an tsaro Sojojin Nijeriya, su kuma jami’an tsaro na farin kaya (DSS) suka ci gaba da tsare su ba bisa ka’ida ba tare kuma da shayar da shi guba.

A sakamakon dukkanin wadannan abubuwa masu cutar da lafiyar dan Adam da kuma tunaninsa, Shaikh Zakzaky ya yi fama da matsanancin ciwon shanyewar jiki, wanda yanzu haka yana tasowa a kai a kai. Sanannen abu ne cewa, Shaikh Zakzaky ya rasa idonsa guda daya a sakamakon harin ta’addancin da jami’an tsaro Sojojin Nijeriya suka kaddamar, kuma a yanzu haka akwai babbar barazanar rasa dayan idon nasa da ya rage, lamarin da zai sabbaba masa rasa gani kwata-kwata. Bincike ya nuna cewa a yanzu haka gubar Dalma da ke cikin jikinsa ta nunka sau ashirin!

Haka nan kuma, mai dakinsa, Malama Zeenah tana cikin matsanancin ciwon jiki a tsawon wadannan shekaru kimanin hudu da aka kwashe ana tsare da su ba bisa
ka’ida ba. A halin yanzu tana iya tafiya ne kawai tare da taimakon kujerar guragu. Kuma ko a yau dukkanin su, Shaikh Zakzaky da mai dakinsa, ba su iya taka kafafuwansu ba suka shiga cikin zauren Kotun, sai dai suka zauna a wani ofishi a yayin da ake sauraron karar.

Duk da irin wannan mawuyacin hali da wadannan bayin Allah suke ciki, amma sai ga shi Kotun ta ba wa gwamnati damar ta kashe su sannu a hankali ta hanyar jinkirin da babu dalili.

Muna kara jaddada godiyarmu ga Allah Madaukakin Sarki wanda yake kara tabbatar wa duniya cewa Gwamnatin tarayyar Nijeriya ba za ta iya yin adalci, ba kuma ba ta shirya yin adalcin ba, ko da kuwa ta fuskacin shari’a ne. Wannan lamari ya kara tabbatar wa da al’ummar duniya cewa Harkar Musulunci a Nijeriya da Jagoranta su aka zalunta kuma ake ci gaba da zalunta, tare kuma da kulla masu makirce-makirce wanda gwamnatin Buhari take yi.

Muna son mu yi amfani da wannan dama domin nuna jinjinarmu da kuma bayyana godiyarmu ga dukkanin ma’abota hankali da adalci, masu rajin kare hakkin dan Adam da kuma kungiyoyin kare ‘yancin bil’Adama, ‘Yan jaridu da dukkanin wadanda suke ci gaba da goyan bayan fafutukarmu ta ganin an yi adalci ga wadanda kisan kiyashin Zariya ya rutsa da su. Za mu ci gaba da fafutukarmu ba tare da gajiyawa ba har sai hakarmu ta cimma ruwa.

Muna godiya a gare ku, Allah ya yi albarka.

SA HANNU:
Abdurrahman Abubakar Yola
Shugaban kwamitin fafutukar ganin an Saki Shaikh Zakzaky
18/07/2019
Fassarar Zaharaddeen Sani Malumfashi.

Guba A Jikin Sheikh Zakzaky: Halin Da Mahaifana Ke Ciki fadin Babban Dansa, Mohammed Ibraheem Zakzaky

A wannan Asabar din 6 ga watan Yulin 2019, na samu haduwa da Mahaifina da Mahaifiyata. Kamar dai yadda a ka bayyanawa mutane, rayuwar Mahaifina na fuskantar barazana daga gubar da ta tasirantu a cikin jininsa. A sanadin wannan, dukkan kwararrun da muka tuntuba dangane da rashin lafiyan sun bayar da shawarar dole a gaggauta kwantar da Mahaifina a asibitin da ke da wadatattun kayan aiki domin a iya ceton ransa. Wannan a na maganar sama da wata guda da ya shige, amma har yanzu din nan shiru ka ke ji, ba abin da a ka yi a kai.

Mahaifiyata kuwa, wacce tun da dadewa an san irin cututtukan da ke damunta, har wa yau babu wata kulawa da ta samu kamar yadda kwararru suka yi bayani. Irin radadin da ta ke fama da shi daga cututtukan a bayan duk wata, ya dawo yana addabarta a kowacce rana. Kuma fa har yanzu ba a dauki hanyar magance ko daya cikin wadannan cututtuka ba.

Da muka hadu, bayan irin tabarbarewar rashin lafiyar mahaifina da muka iya lura da shi kamar yadda hakoransa suka sauya suka yi bakikkirin, ya sanar da ni cewa, lamarin jikinsa ya sake tabarbarewa ne fiye da lokutan baya da muka ziyarce shi. Abin ban tsoron shi ne, jikinsa ya fara yin yanayi sak da lokacin da ya kamu da matsalar shanyewar barin jiki a watan Janairun 2017. Wanda a baya, sai lokacin bayan lokaci ne yake fama da matsanancin radadi, amma yanzu kusan kullum ne.

Duk da dai bana son cire tsammani, amma a irin halin da a ke ciki, ina tunanin zai yi min wahala na iya ceton rayuwar Mahaifina, saboda duk wata hanya da muka bi wurin ganin an ceci rayuwarsa sai an dakusheta ko an haifar mata da matsala da gangan. A shekarun baya na fadi cewa, akwai shirin kashe Mahaifana ta hanyar yin biris da lamarin tabarbarewa rashin lafiyarsu, duk da a wancan lokacin ban san irin tsanantar cutar nasu ba. Kawowarsu yanzu a raye, abin al’ajabi ne wannan daga Allah.

Daga bayanan da na tattara daga wurin qwararru a makonnin da suka gabata, cike da takaici nake son na sanar da cewa, lokacin da a ke da bukata don ceto rayuwarsu kusan ya wuce. Wannan ba komi bane face kokarin yin kisan kai da gangan, wanda kuma an kusa cimma manufa. Wanda kuma makasan a shirye suke da su aikata kisan kansu ba tare da wata damuwa ba.

Mohammed Ibraheem Zakzaky

Duk wani yunkuri na amfani da tashin hankali a Abuja da sauran wurare ba da yawunmu ba ne

Harkar Musulunci a Nijeriya ta lura da wasu wallafe-wallafe da ke karakaina a shafukan sada zumunta na zamani da ke ikirarin cewa daga Litinin 01/07/2019, Abuja za ta fuskanci gagarumin tashin hankali yayin muzaharorin neman a saki Shaikh Zakzaky da aka dade ana yi. Dangane da haka, muna fadi da babbar murya kuma a sarari cewa, ba ruwanmu da duk wata barazanar yin amfani da tashin hankali a yayin da muke neman a saki Jagoranmu Shaikh Ibraheem Zakzaky da matarsa Malama Zeenah Ibrahim da sauran ‘yan’uwa musulmi da gwamnati take tsare da su dangane da kisan kiyashin Zariya na watan Disamban 2015.

Mun fada sau shurin masaki, kuma mun nuna a aikace a tsawon shekarun nan cewa, amfani da tashin hankali da kuma yin barazana, da ba da wa’adi, ba halinmu ba ne, kuma bai taba zama daya daga cikin hanyoyin da mukan bi don cimma muradunmu ba. Hakan kuma ba zai sauya ba.

Yadda muka rika bin hanyoyin lumana a fafutukarmu na neman ‘yancin Shaikh Zakzaky a tsawon shekaru tun bayan kisan kiyashin da gwamnati ta shirya kuma ta aiwatar ya isa ya tabbatar da cewa, mu ba ‘yan tashin hankali ba ne, duk kuwa da irin girma ko munin takalar mu da aka yi.

Shaikh Zakzaky bai taba yin kira zuwa ga tashin hankali ba, don haka duk wanda aka ga yana bin tafarkin tashin hankali ba zai kasance daga cikin mu ba. Ta yiwu gwamnati ce kawai ke neman shafa wa Harkar Musulunci kashin kaji, don su samu hujjar kare gazawar Buhari a dukkan bangarorin mulkin kasar nan.

Amma muna so jama’a su sani cewa, za mu ci gaba da muzaharorinmu na lumana, tare da bin duk wata hanya ta lumana da ta dace don neman a yi mana adalci, kamar yadda muka saba yi har sai mun fallasa irin munanan cin zarafin ‘yan kasa da gwamnatin nan take yi. Ba za mu yi kasa a gwiwa ba wajen neman hakkokinmu, wadanda hatta tsarin mulkin kasar nan ya kare mana su.

A karshe, muna kara yin kiran a gaggauta sakin Jagoranmu Shaikh Zakzaky da matarsa, wadanda halin rashin lafiyarsu a kullum kara tabarbarewa yake yi, musamman irin guban da aka ruwaito an yi yunkurin sa musu a yayin da suke tsare, baya ga guban da ke jikinsu na burbushin harsasan da aka harbe su da su. Kasantuwarsu cikin koshin lafiya abu ne mai matukar muhimmanci a gare mu, kuma Buhari za mu dora wa laifin duk wani mummunan abin da ya sami Shaikh Zakzaky da matarsa.

SA HANNUN:
IBRAHIM MUSA
SHUGABAN DANDALIN YADA LABARAI NA HARKAR MUSULUNCI A NIGERIA
Skype: Ibrahim.musa42
30/06/2019

BUHARI NA WASA DA LAFIYAR SHAIKH ZAKZAKY

A ranar Juma’a 21/06/2019 waki’ar kisan kiyashin da gwamnatin Buhari ta yi ga Shaikh Zakzaky da jama’arsa ta cika watanni 42 da kwana 10 a lissafin Miladiyya. Ta’addancin da ya fara a ranar Asabar 12/12/2015. Tun sannan ba mu gushe ba muna fitowa daga lokaci zuwa lokaci muna muzaharar lumana don tunawa jama’a irin bakin zaluncin da aka yi wa Jagoranmu Shaikh Zakzaky, tare da yin kira ga gwamnatin da take tsare da shi ba bisa hakki ba, da ta sake shi cikin gaggawa, ba tare da wani sharadi ba.

Sanin kowa ne cewa, har ya zuwa yau din nan da muka sake fitowa, gwamnatin Buhari ba ta bi umurnin wata babbar kotun Abuja da ta ce a sake shi ba, har ma a biya shi diyya, shi da mai dakinsa Malama Zeenah Ibrahim. Tunda ko haka ne, hakarmu ba ta cimma ruwa ba kawo yanzu, to ba za mu yi kasa a gwiwa ba, za mu ci gaba da fitowa don jaddada bukatunmu da sake tunatar da jama’a.

A wannan karon hankalinmu ya kara tashi ne saboda yadda rashin lafiyar Jagoranmu Shaikh Zakzaky ke kara tabarbarewa a kullum, saboda burbushin harsashin da ke jikinsu da kuma guban da ke tattare da harsasan. Sanin kowa ne cewa wasu kwararrun Likitoci da suka zo daga kasashen waje tare da hadin gwiwar Likitocin gwamnati sun duba lafiyar Jagoran namu da matarsa, kuma sun ba da sanarwar cewa suna bukatar kulawar gaggawa a Asibitin kwararru wanda samun sa sai a kasashen waje. Kawo yanzu dai ba wata alama da ke nuna gwamnati ta yi wani abu kan wannan rahoto na Likitoci.

Ko ba mu fada ba, duk wani mai hankali ya san cewa, gwamnatin Buhari tana jan kafa ne a kan wannan bukata tamu ta sakin Jagoranmu Shaikh Zakzaky da burin ko ta Allah ta kasance da shi (wa iyazu billah). Amma ganin yadda tsohon Shugaban Misira, kuma daya daga cikin jagororin kungiyar masu kishin Musulunci ta Ikhwanul Muslimun, wato Muhammad Mursi, ya rasu yana tsare a hannun azzaluman mahukuntan Misira, hankalinmu ya kara tashi, kuma damuwarmu da halin da Jagoranmu ke ciki takaru.

Zai zama katon kuskure idan mahukuntan Nijeriya da ma sauran azzaluman mahukunta irin na Misra, za su yi zaton idan wani wanda suke tsare da shi ya rasu a hannunsu, babu hannunsu a ciki. Wannan zaton da suke yi ba mai karbuwa ba ne a mizanin hankali da ma shari’a. Ya za a yi kuna tsare da bawan Allah, kun hana shi damar ya je ya kula da lafiyarsa yadda ta dace, sannan ya rasu, ku ce ba laifinku ba ne, mutuwar karar kwana ce, lokacinsa ne ya yi? Sanin kowa ne cewa ba haka ake mutuwar karar kwana ba.

Tun farkon wannan waki’a ta kisan kiyashin Zariya a 2015, mun san cewa wannan gwamnatin ta Buhari ta fito da karfinta ne don ta kashe Jagoranmu Shaikh Zakzaky da jama’arsa, Allah ne kawai ya cece shi daga hannunsu, ba don suna so ba. Muna rokon Allah Madaukakin Sarki ya ci gaba da ba Jagoran namu kariya daga sharrin makiyansa a wannan karon da suke tunanin sannu a hankali ta Allah za ta kasance tare da shi. Duk da haka muna son su sani ba za mu lamunci wannan dabara ba ta kisan mummuke. Ba fa za mu zura ido kawai karin wani mummunan abu ya samu Jagoranmu ba, don kuwa mun san wadanda suke da alhakin haka, kuma kansu za mu dora alhakin.

Don haka muna kara kira ga duk wani mai yi wa kasar nan fata na gari da ya ja hankulan azzaluman mahukuntan kasar nan kan gurguwar dabarar da suka dauka ta ci gaba da tsare Jagoranmu Shaikh Zakzaky da sauran ’yan’uwa bisa uzurin cewa yana fuskantar shari’a a wata kotun jeka-na-yi-ka ta jihar Kaduna. Karrr muke kallon su! Mun ki wayon! Ku sakar mana Jagoranmu kawai! Ba ku da wani uzuri na kin yin hakan da gaggawa!

SA HANNU:
SHAIKH ABDULHAMID BELLO ZARIYA
21/06/2019

Takardar da aka raba wa jama’a ke nan yayin muzaharar Free Zakzaky yau a garuruwan kasar nan

TAKARDAR SANARWAR MANEMA LABARAI

An raunata tare da kama da dama, yayin da ‘yansanda suka bude wuta kan masu muzaharar Qudus

Rahotannin da suka riski Harkar Musulunci a Nijeriya daga garin Kaduna sun nuna cewa mutane da dama ne suka sami raunuka sabili da bude wutar da ‘yan sanda suka yi yayin da ake gudanar da muzaharar Ranar Kudus ta duniya, wanda a yau ake yin sa a duk fadin duniya. Sun kuma kama wasu masu muzaharar da ake yi don nuna goyon baya ga Palasdinawa raunana.

Tun da safiyar ranar yau Juma’a ne aka ga jami’an tsaro ‘yan sanda da yawa cikin shirin yaki suna fatiro a manyan titunan garin Kaduna tun kafin ma a fara muzaharar.

Jim kadan da fara muzaharar kuwa, sai ‘yan sanda rike da muggan makamai suka bude wuta ba tare da wani gargadi ba da tiyagas da harsasai masu rai kan mai uwa-da-wabi. Wannan ya jawo rudami da guje-guje a manyan titunan tsakiyar birnin na Kaduna.

Bayan nan an gan su suna kakkafa shingaye da tattare tituna da karkatar da ababen hawa daga tsakiyar birnin.

Ya zuwa lokacin fitar da wannan sanarwar, ba a san takamaime mutane nawa ne ‘yan sandan suka raunata ko kama ba, amma dai matakin da ‘yan sandan suka dauka ya dakatar da zirga-zirga a tsakiyar garin.

An ji mutanen gari da yawa suna yin tir da abin da ‘yansandan suka yi, suna masu cewa ai wannan ba shi ne karon farko da ake yin muzaharar Kudus lami lafiya a garin Kaduna ba, don haka me ya sa ‘yansanda za su kawo hari, alhali sai a neme su a rasa idan aka ce ga mahara ko masu garkuwa da mutane suna kawo hari, amma sai a gan su cikin shirin yaki in an fito muzaharar lumana?

Wannan muzaharar ta tunawa da Ranar Kudus an yi ta a ko’ina a fadin kasar nan lami lafiya in banda Kaduna, inda Gwamnan jihar ke cikin shirin zubar da jinin mutane a cikin watan Ramadan mai tsarki.

Don haka, wannan Gwamnan ne ke da alhakin duk wani mummunan abin da ya sami jama’ar da suka fito muzaharar lumanar.

SA HANNUN:

IBRAHIM MUSA
SHUGABAN DANDALIN YADA LABARAI
HARKAR MUSULUNCI A NIJERIYA
31/05/2019

SHAWARWARIN LAUYA FALANA KAN MUZAHARORIN ‘YAN’ UWA

Kar ku bar muzaharar lumana!

Daga ALMIZAN ta makon

Sanannen Lauyan nan mai fafutukar kare hakkin dan Adam, kuma babban Lauya a Nijeriya (SAN), Femi Falana, wanda kuma shi ne Jagoran Lauyoyin da ke kare Jagoran Harkar Musulunci a Nijeriya, Sheikh Ibraheem Zakzaky, ya yaba da irin yadda ake ci gaba da muzaharorin neman ’yancin Shaikh Zakzaky cikin lumana, duk kuwa da tsokana da tsangwamar da jami’an tsaro suke yi wa mabiyar Harkar Musuluncin.

Ya yi wannan yabon ne sa’ilin da masu muzaharar neman a saki Shaikh Zakzaky suka isa ofishin Hukumar kare hakkkin dan Adam ta kasa da ke Abuja aranar 2 ga Mayu, 2019, shi ma kuma a lokacin ya je ofishin.

Ya hori masu muzaharar da kada su kauce daga tafarkin yin muzaharar cikin lumana, domin hakan ne zai sa aikin da suke yin a kare Jagora a kotu zai zo da sauki.

Ga fassarar jawabin da ya yi na kusan mintuna uku cikin harshen Turanci, wanda Wakilinmu ya yi:

“Zan bi sahun babban Sakataren Hukumar kare hakkin dan Adam ta kasa, Mista Tony Ojukwu wajen yaba muku kan irin yadda kuke tafiyar da al’amuranku cikin lumana, kuma ina so ku ci gaba da hakan.

“Abin da kuka nuna wa duniya a tsawon wadannan shekaru shi ne ku ba ’yan tashin hankali ba ne. Don haka muna so ku ci gaba da bin hanyar lumana a yayin da kuke neman hakkokinku.

“Ina mai farin cikin shaida muku cewa Jagoranku da matarsa suna farin cikin yadda kuke muzaharorin nan a madadinsu.

“A makon jiya gwamnati ta bi umurnin babbar kotun jihar Kaduna da ta ce Jagoranku da matarsa, Likitocinsu su ziyarce su, su duba su, su kuma yi musu gwaje-gwaje. Likitoci sun zo daga kasar waje, tare da likitocin gwamnati sun duba su. Kuma nan ba da jimawa ba za a ba su kulawar da ta dace. Saboda mun bayyana wa gwamnati a sarari cewa, in kina so ki hukunta mutane, to dole ya zama suna da ran da za su iya tsayawa a hukunta su. Kuma gwamnati ta yarda da hakan. Shi ya sa suka kyale Likitocin da Jagoranku ya kawo suka ziyarce su suka duba su. Don haka muna da kyakkyawar fatan cewa, nan ba da jimawa ba Jagoranku zai samu ’yancinsa.

“Kamar yadda Sakataren NHRC ya ba da shawara, to ku ci gaba da yin komai cikin lumana. Har sai idan kuna yin komai cikin lumana ne, aikinmu mu kuma zai zo da sauki. Wadanda suke waje ma za su ci gaba da goyon bayanku ne in kuna yin komai cikin lumana.

“Kuma yayin da kuke yin al’amuranku cikin lumana, kar ku yi tsokana. Kar ku dami sauran ’yan Nijeriya. Kar ku takura wa sauran masu bin hanyoyi, saboda ’yancinku yana karewa ne a daidai inda nasu ke farawa.

“Kar ku farmaki duk wani dan sanda ko wani mutum mai sanye da kayan Sarki. Idan kuka yi hakan, kun ba da damar a kashe ku ne ko wasunku. Kuma ba mu fatan hakan ya sake aukuwa. Dangane da wadanda aka karkashe kuwa, muna daukar matakan ganin cewa an yi adalci. Duk wadanda suka kashe mutane sai an gurfanar da su gaban shari’a a kasar nan. Don haka ku ci gaba a yadda kuke yi, kuma Hukumar nan za ta marabce ku a koyaushe da sharadin kuna yin komai cikin lumana.

“Na gode muku kwarai da kuka ba ni wannan damar, kuma ina mai tabbatar muku zan ci gaba da fafutuka a madadinku. Na gode.”

In za a iya tunawa a karkashin Lauya Falana ne wata babbar kotun Tarayya da ke Abuja ta yanke hukunci mai tarihi, inda ta ce gwamnati ta saki Jagoranmu Shaikh Zakzaky da matarsa a 2016, amma gwamnatin ta ki bin umurnin.

Har ila yau a karkashinsa ne wata babbar kotu a Kaduna ta saki wasu ‘yan’ uwa musulmi kusan 100 a watannin baya, wadanda aka kama su a lokacin kisan kiyashin Zariya, ta wanke su da cewa ba su aikata laifin da ake zargin su ba.

Sai kuma nasarar da Lauya Falana ya samu ta amincewar babbar Kotun jihar Kaduna ta ba da umurnin Shaikh Zakzaky ya kawo Likitocjnsa su duba shi. Sun kuma zo sun yi aikinsu. Saura a ga me kotu za ta yi da sakamakon binciken Likitocin?

Gaskiyar Magana: Buhari Allah zai tambayeka dangane da kashe-kashe da ake wa bayin Allah a mulkinka

Shaikh Zakzaky na bukatar a fita da shi waje ne domin duba lafiyar sa — Cewar kwararrun Likitocin da suka yi gwajin jikinsa cikin wannan mako

Fassarar Abdullahi Isah WasaguTawagar kwararrun Likitocin da suka duba lafiyar jikin Shaikh Ibraheem Zakzaky da mai dakin sa Malama Zeenatuddeen Ibraheem a cikin wannan mako, sun bayyana cewa, “Shehin Malalin na bukatar a fita da shi waje ne inda a kwai isassun kayan aiki da kuma wadatattun Malaman jinya domin duba lafiyar sa shi da mai dakin tasa”.Idan dai masu karatu ba su manta ba, a ranar Alhamis din da ta gabata ne 25/4/2019, wata tawagar kwararrun Likitoci daga kasashen ketare suka iso nan gida Najeriya domin duba lafiyar Shehin Malamin. Wannan kuwa ya biyo bayan koken da babban lauya mai kare Sheikh Ibraheem Zakzaky a Kotu ya yi ne a ranar 22 ga watan Janairun da ya gabata a lokacin daya daga cikin zamamen babban Kotun jahar Kaduna mai lamba 4 dake cikin birnin Kaduna.Bayan ganawar su da Shehin Malamin ne suka bayyana cewa, dukkan su biyun suna bukatar a fita da su ne Kasar waje, domin har yanzu jikkunan su suna bukatar hutu da kuma kulawa sosai na manyan kwararrun Likitoci.A cewar Lauyoyi masu kare Shaikh Ibraheem Zakzaky, sun mikawa Kotu takardar neman a bawa wanda suke karewa wato Shaikh Zakzaky damar ya zo da kwararrun Likitoci ne daga waje bisa wasu manufofi kamar haka:1- Na farko a domin tabbatar da cewa wai shin ko wanda suke suke karewa ya samu kyakkyawar kulawa da ta dace ta likitoci shi da mai dakinsa Malama Zeena, tsawon lokutan da suka kwashe suna tsare a hannun Jami’an tsaron ciki DSS tun watan Disambar 2015.2- Domin su gwada lafiyar jikin su da kuma yanke hukuncin a kan ko ya dace su ci gaba da zama a Najeriya domin ci gaba da sauraron tuhumar da ake musu a Kotu.3- Domin su fitar da shawarwari ko matakan da suka dace dangane da rashin lafiyar Shaikh Ibraheem Zakzaky da mai dakinsa.Wadannan manufofi dai sune manyan dalilan zuwan tawagar kwararrun Likitocin a cikin wannan mako wanda daya daga cikin manyan Jami’an Hukumar Kare Hakkin Bil’Adama ta Musulunci Mr. Masoud Shadjareh ya jagoran ce su.Tawagar Likitocin dai sun hada da Dakta Dhalla Kazim Akber Habib dan asalin Kasar Tanzaniya sai kuma Dakta Nurul Abbas Noorani, Dakta Hemani Shezanali Riyaz, sannan sai Dakta Panjawani Taufiq Rafiq dukkan su sun so ne daga Kasar Indiya.

Yadda Likitoci Daga Kasar Waje Suka Gana Da Shaikh Zakzaky

Daga Wakilinmu
Da yammacin yau Alhamis ne, rahotanni suka riski MUJALLAR GWAGWARMAYAcewa; Likitoci daga kasar waje sun fara duba lafiyar Shaikh Ibraheem Zakzaky da matarsa Malama Zeenah a yau Alhamis 25/4/2019.
Wannan hoton da ke sama Shaikh Zakzaky ne tare da Likitocin nasa da matarsa a yau Alhamis.
Shaikh Ibraheem Zakzaky na tsare tun fiye da Shekaru 3 da suka gabata, duk kuwa da yau fiye da Shekaru biyu da kotun Nijeriya a Abuja ta ce a sake shi a biya shi diyyar tsarewar da aka masa ba bisa ka’ida ba.
A ranar 22 ga Junairun 2019 ne babban lauyan Shaikh Ibraheem Zakzaky, Femi Falana SAN, ya mika bukata ga kotu a kan ta bari a bar Shaikh Ibraheem Zakzaky ya je ya nemi magani a wajen kwararrun Likitoci a waje. Sai kotun ta ba da umurni a zo da Likitocin daga ki ina su duba Shaikh din su ga yanayin jikinsa sai su ba kotu rahoto, sannan ta duba yiwuwar bari a fita da shi ko ai masa magani a nan.
Shaikh Zakzaky na fama da rashin lafiya sosai, sakamakon harbin da sojoji suka masa a kafa da hannu da ido, har ya zama ya rasa idonsa guda daya. Haka ma Matarsa Malama Zeenah Ibraheem, ta na fama da raunin harsasai a yayin da har yanzu akwai wadanda ba a cire su a jikinta ba, har ma ba ta cika iya tafiya da kafarta ba.
@MujallarGwagwarmaya
25042019

‘Yanci Shaikh Zakzaky yake bukata, ba ciyarwa ba!

Ministan Yada labarai na Tarayyar Najeriya, Lai Mohammed, bisa karya ya yi ikirarin cewa, Gwamnatin Buhari tana kashe zunzurutun kudi Naira Miliyan Uku da rabi (N3.5M) a kowane wata ko kuma kashe Naira dubu dari da goma sha biyar (N115,000) a kullum wajen ciyar da Jagoran Harkar Musulunci a Najeriya, Shaikh Ibraheem Zakzaky, wanda ake tsare da shi ba bisa ka’ida ba. Ministan ya yi wannan ikirari ne a ranar Laraba 7/11/2018, a daidai ranar da Kotun Jihar Kaduna ta ki amincewa da bayar da belin na Shaikh Zakzaky a wani faifen bidiyon da ya tambatsa a intanet, a yayin da yake ganawa da wasu ‘yan Jarida.Harkar Musulunci a Najeriya ta yi amannar cewa wannan wani bangare ne na yaudara irin ta wannan gwamnati wajen nuna cewa ita “ta kwarai” ce bayan kuma ta kashe ‘yan Kasa fararen hula sama da dubu daya wadanda ba su dauke da makami a garin Zariya a cikin watan Disambar 2015. Dadin dadawa ‘ya’yan Shaikh Zakzaky Maza guda uku da ke cikin gidansa a lokacin na daga cikin wadanda aka yi wa kisan gilla a gabansa kuma aka rufe su a kabari na bai daya. Zaluncin bai tsaya haka nan ba. Gidan na Shaikh Zakzaky an rusa shi, kana kuma daga baya aka mayar da shi fili.Wannan gwamnati ta shaida wa duniya ta hanyar babbar Kotu da ke Abuja cewa, Shaikh Zakzaky bai aikata wani laifi ba, amma suka harbe shi da mai dakinsa, suka kuma ci gaba da cutar da su, wai duk da sunan ba shi kariya. Lamarin da Kotu ba ta amince da shi ba, ta kuma bayar da umarnin a sake shi. Umarnin da har yanzu wannan gwamnati ta Buhari ta yi kunnen Uwar-shegu da shi. Sai ga shi yanzu wannan gwamnati ta yi kememe ta shirga wa duniya karyar cewa suna kula, tare kuma da “kyautata” masa.A yayin da wasu daga cikin ‘yan’uwa Musulmi na Harkar Musulunci a Najeriya suka gana da Shaikh Zakzaky a farkon watan da ya gabata, daga cikin abin da ya koka masu da shi akwai batun rashin samun ingantaccen abinci da yake fama da shi tun bayan dawo da shi garin Kaduna a tsawon watanni shida da suka gabata. Bisa la’akari da yawan shekarunsa da kuma halin rashin lafiya da yake ciki, to ya kamata a ce yana samun kyakkyawar kulawa ta abinci, amma ina, wadanda ke tsare da shi sun hana shi samun hakan. Wannan lamari ya nuna cewa, akwai wadansu Jami’an tsaro na gwamnati da ke wawashe kudin al’umma a ci gaba da tsare Shaikh Zakzaky da sunan ba shi kariya, lamarin da babbar Kotu da ke babban birnin tarayya Abuja tuni ta bayyana shi a matsayin haramtacce bisa kundin tsarin mulkin Kasa (Constitution).Haka nan kuma ikirarin da Ministan ya yi wanda ya ce ‘ba abin ruwaitowa ba ne,’ hakan ya fallasa almundahanar da ke tattare da hukumar tsaro ta farin kaya (DSS). Wannan zunzurutun kudade za su iya zama gaskiya a rubuce a wajensu, amma gaskiyar lamari shi ne suna amfani da hakan ne wajen wawashe dukiyar al’umma da sunan ciyar da Shaikh Zakzaky, alhali kuwa gaskiyar lamari shi ne Shaikh Zakzaky shi yake ciyar da kansa kuma shi yake sai wa kansa dukkanin kayan bukatuwa na rayuwa.Batun kudi Naira dubu dari da goma sha biyar na ciyar da Shaikh Zakzaky a kullum da Ministan yada Labarai, Lai Mohammed ya yi ikirari ya yi kama da batun ciyar da Fursunoni wanda gwamnatin Najeriya ta yi ikirarin cewa tana kashe Naira dubu goma sha hudu da dari biyar a kullum ga kowane Fursuna da ake tsare da shi a tarayyar Najeriya. Amma da za ka ziyarci Fursunonin, da za su fada maka cewa, dukkanin abin da aka fada karya ne. Fursunonin suna fama da rashin samun abinci mai gina jiki da kuma rashin lafiya, baya kuma ga matsalar rayuwa cikin cinkoso da kuma rashin tsaftar muhalli.Muna kallon wannan bayani na Ministan yada Labarai a matsayin cin fuska da kuma cin mutunci ga Jagoranmu, Shaikh Ibraheem Zakzaky. Muna shawartar Ministan yada labarai na Najeriya, Lai Mohammed da ya guji sanya Shaikh Zakzaky cikin jerin mutanen da yake shirga wa karya da karairayi, ya kuma yi gaggawar shelanta wa ‘yan Najeriya gaskiyar lamari na cewa gwamnati ba ta kashe wa Shaikh Zakzaky wannan zunzurutun kudade ba.Muna kara jaddada kiranmu ga gwamnati da ta gaggauta sakin Jagoranmu, Shaikh Ibraheem Zakzaky, domin ya samu damar samun kyakyawar kulawa ta Likitoci a Kasar waje.SA HANNU:
IBRAHIM MUSA
SHUGABAN DANDALIN YADA LABARAI NA HARKAR MUSULUNCI A NAJERIYA
Skype: Ibrahim.musa42
09/11/2018
Fassarar Zaharaddeen Sani Malumfashi.

Lauyoyi Sun Samu Ganawa Da Shaikh Zakzaky

— Saifullahi M KabirMun samu labarin cewa jiya Litini da yammaci hukumar Nijeriya da suke tsare da Jagora, Shaikh Ibraheem Zakzaky (H) sun ga damar bari lauyoyinsa su gana da shi.Kwamitin da ke fafutukar ganin an saki Shaikh Zakzaky sun bayyana a shafinsu na yanar gizo cewa, Lauyoyin wanda Femi Falana SAN ke jagorantarsu, sun gana da Shaikh Zakzaky da matarsa Malama Zeenat ne a ofishin DSS da ke Kaduna a yammacin jiya Litini 28/5/2018.Wannan ganawar dai shine karo na uku tsakanin Shaikh Zakzaky da lauyoyinsa tun bayan kama shi da aka yi da tsare shi da hukumar kasar nan take yi a kusan tsawon shekaru biyu da rabi.Tun dai ranar 15 ga watan Mayun nan ne hukumar kasar ta canzawa Shaikh Zakzaky da mai dakinsa, Malama Zeenat wajen tsarewa, inda a da ake tsare da su a Abuja, amma daga wannan ranar bayan fito da su daga kotun da aka kai su ana zarginsu da laifi a karon farko, ba a sake ganinsu ko jin labarin inda suke ba sai a jiyan.Wasu na ganin cewa kai Shaikh Ibraheem Zakzaky, matarsa da wasu biyu daga almajiransa Kara da gwamnatin Kaduna ta yi tana cajinsu da aikata laifuka guda takwas, daga ciki har da zargin kashe wani soja mai suna Kofur DanKaduna, bayan abin da ya bayyana cewa sojoji sun kashe almajiransa fiye da 1000, da ‘ya’yansa da danginsa ba a Kuma kama Koda soja daya an zarge shi da laifi ba, na nufin wani sabon salon borin-kunya kuma sabon shafin zalunci da danniya.Dadin abin shine, a kan kare a Duniyar, kuma a Lahira akwai hisabi. Ba inda ba Allah. Kuma shi ke kare bayinsa masu dogaro gare shi. Ya kasance yana daga kafa (Talala) ga azzalumai har su dauka cewa su ne masu iko. Kamunsa tabbatacce ne, kuma ba a jimawa.

IMN Ta Zargi Gwamnatin Buhari Da Kokarin Kawar Da Sheikh El-Zakzaky

Wani fitaccen malami, Sheikh Abdulhamid Bello ya zargi gwamnatin Buhari da yunkurin makarkashiya na kashe Sheikh El-zakzaky.Sheikh Bello, wanda yake mamba ne na kungiyar ta El-Zakzaky ya bayyana hakan a yau Talata, 15 ga watan Mayu, 2018 inda yace “kwanaki 880 kenan da kama shugabanmu, Sheikh Ibrahim Zakzaky, ba bisa kaida ba. Hakana kuma sati biyu kenan da kaimasa sammacen kotu, wanda shi kuma yaki sa hannu, ya kuma umarci hukuma da tayi abinda ya dace tukuna, ta bi umarnin kotu, ta sake shi”.Sheikh Bello ya kara da cewa, abinda yake faruwa na baya-bayannan zai iya harzuka mabiyan kungiyar ‘yan-uwa musulmi (IMN), duba da irin abinda sojoji suka yiwa shugabannasu a watan Disambar 2015. Shehin yayi kira da kakkausar murya ga gwamnatin tarayya cewa itace alhakin duk abinda ya faru da shugabansu.Rahoton HausaTv

Mu’assasar Shuhadah ta harkar Mudulunci a Najeriya ta bayyana ranar babban taron tunawa da Shahidai na bana

Mu’assasar Shahidai ta Harkar Musulunci a Najeriya shiyyar karkashin jagorancin Sayyid Ibraheem Zakzaky ta bayyana ranar babban taron tunawa da shahidai na bana na shekarar 2018.Taron aka shirya zai gudana ranar Alhamis nan mai zuwa 12 ga watan Aprilu, 2018.Za a gabatar da taron ne a dandalin ‘yanci da aka fi sani da “Unity Fountain” dake birnin Abuja.Kafin ranar, kamar yadda aka saba, za a gabatar da gagarumin Muzaharar kiran a gaggauta sakin Jagora Shaikh Ibraheem Zakzaky ranar Laraban nan mai zuwa bayan kammala zaman dirshan dake ci gaba da gudana a kullum a dandalin na “Unity Fountain”A taron na bana, a kwai nazari na musamman sakamakon jimillan adadin Shahidan Harkar Musulunci da ya karu wanda hakan ya biyo bayan kazamin kisan kiyashin zariya na shekarar 2015 wanda Sojoji suka kashe daruruwan mabiya Harkar Musulunci cikin ‘yan sa’o’i karkashin umarnin shugaban kasa Muhammadu Buhari.

Advertisements
%d bloggers like this: